Sadəcə bir qadın

On altı yaşlı Hatun Sürücü öz iradəsinə zidd olaraq əmisi oğluna ərə verilir və doxsanıncı illərin sonunda Türkiyəyə yola salınır. Bir ildən sonra hamilə vəziyyətdə Berlinə, valideynlərinin yanına qayıdır. Ailəsi onu qəbul etsə də, qızdan sərt dini qaydalara əməl etməyi, təkbaşına çölə çıxmamağı və atası ilə qardaşlarına sözsüz tabe olmağı tələb edir.

Ağır təzyiqə dözməyən gənc ana yetkinlik yaşına çatmayan analar üçün nəzərdə tutulmuş sığınacağa qaçır. O, elektrik peşəsinə yiyələnir, baş örtüyünü çıxarır, rəqslərə gedir və sərbəst həyat sürməyə başlayır. Altı il sonra kiçik qardaşı küçədə ona atəş açaraq başından üç güllə ilə vurur.

Almaniya istehsalı olan «Nur eine Frau» kriminal dram filmi 2019-cu ildə rejissor Şerri Horman tərəfindən çəkilib. Ekran əsərində baş rolu Almila Bağrıaçık canlandırıb, digər rollarda isə Merve Aksoy, Aram Arami və Mehmet Ateşi çəkiliblər.