Uğursuz qarət

Milad ərəfəsində varlanmaq istəyən iki cinayətkar qeyri-adi üsul seçir. Saqqallı Şaxta baba qiyafəsinə girən yoldaşlar bankı qarət etməyi bacarırlar. Lakin binadan çıxanda məlum olur ki, qaçış üçün hazırladıqları avtomobil evakuator tərəfindən aparılıb.

Nəqliyyatsız qalan qarətçilər dərhal metroya üz tuturlar. Əllərindəki pulla dolu çantanı gizlətmək üçün onu stansiyadakı saxlama kamerasının bir gözünə qoyurlar. Tələsik verilən bu qərar qəhrəmanların vəziyyətini daha da çətinləşdirir.

«Uğursuz qarət» (Hôrudo appu daun) filmi 2005-ci ildə Yaponiyada rejissor Sabu tərəfindən çəkilib. Kriminal komediya janrında olan layihədə əsas rolları Masayuki Sakamoto, Hiroshi Nagano, Yoshihiko Inohara və Ken Miyake canlandırıb.