Sadəcə Cekson

Cinayət axtarış şöbəsinin keçmiş rəisi Deqtyaryovun oğlu qaçırılır və bu işi araşdırmaq Ceksona tapşırılır. O, gəncin zorla mindirildiyi maşının sahibini müəyyən edərək saxlayır. Şübhəlinin avtomobilində axtarış aparan mayor sonuncu inkasator qətlləri zamanı bankdan oğurlanmış külli miqdarda pulla dolu çanta tapır.

İvçenko adlı bu şəxs istintaqı aparan Xmelyova ilə danışmaqdan qəti imtina edir. Cekson anlayır ki, saxlanılan cinayətkar həm oğurlanmış gənclə, həm də bank maşınlarına basqınlarla bağlı yeganə ipucudur. Tezliklə İvçenkonun cinayət yoldaşları mayorun sevgilisi Valentinanı qətlə yetirirlər. Ağır itki ilə üzləşən Cekson qara bazardan silah taparaq qatillərlə təkbaşına mübarizəyə başlayır.

«Sadəcə Cekson» kriminal filmi 2012-ci ildə Rusiyada çəkilib. Ekran əsərinin quruluşçu rejissoru Leonid Plyaskindir. Əsas obrazı Dmitri Bıkovski-Romaşov canlandırıb, digər rollarda isə Andrey Qorbaçov, Yekaterina Suvorova və Qriqori Orlov çıxış edir.