Borc

Adam və Stefan adlı iki yoldaş şəxsi bizneslərini qurmaq niyyətinə düşürlər. Lakin bankdan kredit götürmək üçün onlara zamin lazımdır və bu axtarışlar onları Stefanın keçmiş qonşusu ilə qarşılaşdırır. İndi artıq imkanlı iş adamına çevrilmiş Gerard onlara yardım təklif edir, lakin bunun əvəzində qazancdan böyük pay tələb edir.

Şərtlərin ağırlığını görən dostlar onun xidmətindən imtina etmək qərarına gəlirlər. Buna baxmayaraq, Gerard onları rahat buraxmır və göstərdiyi xidmətlərə görə pul tələb etməyə başlayır. Uydurma borcu geri almaq üçün o, hər iki gəncə qarşı qəddar və alçaldıcı üsullara əl atır.

1999-cu ildə Polşada çəkilmiş «Dlug» kriminal trillerinin rejissoru Kşıştof Krauzedir. Filmdə əsas rolları Robert Qonera, Yatsek Bortsuh, Andjey Hıra və Tsezari Kosinski canlandırıblar.