Pink

Nyu-Dehlidə yaşayan üç gənc qızın adi bir rok konsertinə getməsi gözlənilməz hadisələrlə nəticələnir. Tədbirdən sonra yeni tanış olduqları şəxslərlə şam yeməyinə yollanan qızlar zorakılıq cəhdi ilə üzləşirlər. Özünü qorumağa çalışan rəfiqələrdən biri hücum edən oğlanın başına şüşə qab ilə zərbə endirir və qızlar oradan uzaqlaşırlar.

Səhəri gün xəsarət alan gənc polisə şikayət edir və qızlardan birinə qarşı qəsdən adam öldürməyə cəhd maddəsi ilə cinayət işi açılır. Cəmiyyət və məhkəmə orqanları onların zərərçəkən tərəf olduğuna inanmaq istəmir, günahı gecə vaxtı tanımadıqları insanlarla vaxt keçirən qadınların özlərində görür. Həmin anlarda qızları müdafiə etmək üçün ruhi problemləri səbəbindən peşəsindən uzaqlaşmış yaşlı vəkil Dipak Sehgal prosesə qoşulur.

«Pink» adlı Hindistan istehsalı olan bu gərgin dram filminin rejissoru Aniruddha Roy Çovdhuridir. 2016-cı ildə çəkilmiş ekran əsərində baş rolları Amitabh Baçchan, Taapsi Pannu, Kirti Kulhari və Andrea Tariang canlandırıb.