Sadəlövlərin qisası

Bir qrup uğursuz fırıldaqçı fəaliyyət sahəsini dəyişmək və külli miqdarda saxta əsginas çap etmək qərarına gəlir. Məhsulun satışını təkbaşına idarə edə bilməyəcəklərini anlayan cinayətkarlar, bu sahədə zəngin təcrübəsi olan «Ata» ləqəbli qocaman qanqsteri işə cəlb edirlər.

Artıq təqaüdə çıxmış və Afrikada məskunlaşmış təcrübəli cinayətkar qısa söhbətdən sonra razılaşır və Parisə yola düşür. Şəriklərdən birinin məşuqəsinin əri çox istedadlı qravüraçıdır və saxta pulları hazırlamaq üçün məhz onun bacarığı tələb olunur. Lakin cinayət aləmindən tamamilə uzaq olan bu dinc sənətkarı qanunsuz işə razı salmaq heç də asan olmur.

«Sadəlövlərin qisası» (Le Cave se rebiffe) kriminal komediyasını rejissor Jil Qranjye lentə alıb. Fransa və İtaliyanın birgə istehsalı olan bu film 1961-ci ildə nümayiş olunub. Baş rolları Jan Qaben, Martina Karol, Fransuaza Roze və Bernar Bliye canlandırıblar.