Qırmızı mehmanxana

Pireney dağlarının ucqar bir guşəsində yerləşən kiçik mehmanxana bura yolu düşən yolçular üçün əsl tələyə çevrilib. Maddi çətinlik çəkən qəddar sahiblər lal oğullarını qonaqları öldürməyə və onların əmlakını mənimsəməyə məcbur edirlər. Buna görə də bu məkana qədəm qoyanların heç biri oradan sağ qayıda bilmir.

Bir gün mehmanxanaya bir keşişin rəhbərliyi altında zəvvar dəstəsi gəlir. İllərdir törətdiyi əməllərdən vicdan əzabı çəkən sahibə qadın keşişə günahlarını etiraf etmək qərarına gəlir. Qonaqların ölüm təhlükəsi ilə üz-üzə qaldığını anlayan din xadimi tövbə sirrini aça bilmədiyi üçün çıxılmaz vəziyyətdə qalır.

2007-ci ildə Fransa istehsalı olan «Qırmızı mehmanxana» («L'auberge rouge») filminin rejissoru Jerar Kravçikdir. Əsas rolları Kristian Klavye, Jozian Balasko, Jerar Jünyo və Jan-Batist Monye canlandırıb.