Nifrət toxumu

Yeniyetmə Starr iki fərqli mühit arasında qalaraq günlərini keçirir. O, qaradərililərin yaşadığı kasıb və narahat bir məhəllədə böyüyür, amma təhsilini əsasən ağdərili şagirdlərin oxuduğu imkanlı bir məktəbdə alır. Bu səbəbdən gənc qız daima özünü fərqli aparmağa və mühitə uyğunlaşmağa çalışır.

Bir gecə baş verən hadisə Starrın həyatını alt-üst edir. Polis əməkdaşı narkotik satmaqda şübhəli bilinən onun silahsız uşaqlıq dostunu güllələyir. Hadisənin tək şahidinə çevrilən Starr üçün hər iki cəmiyyətin təzyiqi altında doğru qərar vermək çətin bir sınağa çevrilir.

ABŞ istehsalı olan «The Hate U Give» kriminal dram filmi 2018-ci ildə rejissor Corc Tillman kiçik tərəfindən çəkilib. Ekran əsərində baş rolları Amandla Stenberq, Recina Holl, Rassell Hornsbi və Entoni Maki canlandırıb.