Həyatın dibində

Qumarda hər şeyini uduzan baron canına qəsd etmək fikri ilə evinə qayıdır, lakin tapançasını yerində tapmır. Əvəzində o, evə girmiş Vaska Pepel adlı gənc bir oğru ilə qarşılaşır. Səhərə qədər birlikdə içki içib dərdləşən zadəgan intihardan vaz keçir və indiyədək xəbərsiz olduğu tamam başqa bir həyat səviyyəsinin varlığını öyrənir.

Səhər saatlarında borc verənlər onun bütün əmlakını müsadirə edir. Evsiz qalan keçmiş baron Parisin kənar məhəllələrinə, oğurluq malları qəbul edən Kostılyovun sığınacağına yollanır. Pepelin əvvəllər sahibkarın gənc arvadı Vasilisa ilə münasibəti olsa da, onun qəlbi getdikcə Vasilisanın sakit və utancaq bacısı Nataşaya meyil edir. Paxıllıq və qısqanclıq içində olan Vasilisa isə bacısını rüşvətxor polis müfəttişinə ərə verməyə çalışır.

1936-cı il istehsalı olan «Les bas-fonds» filmini rejissor Jan Renuar Maksim Qorkinin pyesi əsasında çəkib. Fransız cinayət dramında baş rolları Jan Qaben, Lui Juve, Süzi Prim və Jani Holt canlandırıblar.