Karandiru

Karandiru cəzaçəkmə müəssisəsi vaxtilə Braziliyanın ən dəhşətli həbsxanası hesab olunurdu. Antisanitariya, yararsız qidalar, nəzarətçilərin amansız rəftarı və insan haqlarının kobud şəkildə tapdanması məhkumların dözümünü tükəndirmişdi.

Nəticədə 1992-ci ildə dustaqlar kütləvi qiyam qaldırdılar. Polisin müdaxiləsi böyük qırğınla nəticələndi və 111 məhbus həyatını itirdi. Hadisə dünya miqyasında ciddi etiraz doğurdu və hakimiyyət bu rüsvayçı məkanı tamamilə yerlə-yeksan etməyə məcbur oldu.

2003-cü ildə çəkilən «Karandiru» kriminal dram filminin rejissoru Ektor Babenkodur. Braziliya, Argentina və İtaliyanın birgə istehsalı olan bu ekran əsərində baş rolları Luis Karlos Vaskonselos, Milton Qonsalveş, İvan De Almeyda və Aylton Qrasa canlandırıb.