Qüsursuz

Keçmiş polis əməkdaşı Volt hər kəsin hörmət bəslədiyi, fiziki cəhətdən güclü və qüsursuz bir insan təsiri bağışlayırdı. O, daim musiqi ilə məşğul olan qonşusu, transvestit Rasti ilə yanaşı yaşamaq məcburiyyətində qalmışdı. Bir-birinə tamamilə zidd olan bu iki şəxs arasındakı qarşılıqlı narazılıq və anlaşılmazlıq uzun müddət davam edirdi.

Voltun başına gələn ağır xəstəlik onu yatağa bağlayır və sağalmaq ümidini demək olar ki, əlindən alır. Qəribə həyat tərzi sürməsinə baxmayaraq, Rasti köməksiz qalan qonşusuna şəfqət göstərməyi bacarır. O, keçmiş polisə oxuma dərsləri verməyə başlayır və bu məşğələlər Voltu yenidən danışmağa, yaşamaq gücünü bərpa etməyə ruhlandırır.

1999-cu ildə ABŞ-da istehsal olunmuş «Qüsursuz» (Flawless) filminin rejissoru Coel Şumaxerdir. Kriminal dram janrında çəkilmiş ekran əsərində baş rolları Robert De Niro və Filip Seymur Hoffman canlandırıblar.