Hatsukoi

1968-ci il dekabrın 10-u səhər saatlarında Yaponiyada 300 milyon yen daşıyan inkassator maşını qarət olundu. Polis formasını geyinmiş naməlum şəxs böyük məbləğdə pul olan avtomobili çoxlu sayda şahidin gözü qarşısında qaçırmağı bacardı.

Axtarışlara 170 min polis cəlb edildi, yüzdən çox şahid dindirildi və şübhəlilərin sayı 110 mini ötdü. Təhqiqata külli miqdarda vəsait xərclənsə də, cinayətkar həbs olunmadı və oğurlanmış vəsait tapılmadı. Nəticədə 1975-ci ildə bu məşhur iş rəsmi qaydada bağlandı.

«Hatsukoi» filmi Yaponiyanın bu açılmamış sirli cinayət hadisəsinə nəzər salır. Rejissor Yukinari Hanawanın çəkdiyi ekran əsəri 2006-cı ildə təqdim olundu. Əsas rollarda Tomono Kuga, Yuya Matsuura, Munetaka Aoki və Shunji Fujimura çıxış edirlər.