Həyatla ölüm arasında

Brüssel metrosunda qatar sürən Leo növbəti iş günündə dəhşətli bir hadisə ilə üzləşir: relslərin üzərinə gənc bir oğlan düşür. Hadisə yerinə yaxınlaşan sürücü həlak olan şəxsin illərdir görmədiyi doğma oğlu Hüqo olduğunu anlayır. Çox keçmir ki, gəncin böyük bir cinayət şəbəkəsinə bulaşdığı və buna görə öldüyü məlum olur.

İtkisi ilə barışa bilməyən ata ədaləti öz əli ilə bərpa etməyə və qisas almağa qərar verir. Müstəqil şəkildə araşdırmaya başlayan Leo tədricən cinayətkar qrupların izinə düşür. Eyni zamanda polis əməkdaşları da hadisəni tədqiq edərkən adi metro işçisinin arxasında çox təhlükəli keçmişin gizləndiyindən şübhələnməyə başlayırlar.

«Entre la vie et la mort» filmi 2021-ci ildə rejissor Cordano Qederlini tərəfindən çəkilib. İspaniya, Fransa və Belçikanın birgə istehsalı olan ekran əsərində baş rolları Tibo Vandenborre, Fabris Add, Olivye Qurme və Marina Vakt canlandırıb.