Virtual Silah

FTB-nin məxfi əməkdaşı Skimz Vaşinqtondan Mayamiyə ezam olunur. Onun əsas vəzifəsi təhlükəli silah alverçisi Abel Van Akseli yaxalamaqdır. Bu çətin tapşırıqda ona Mayami polisinin detektivi Marvin və kompüterlərdən əla başı çıxan on yaşlı Loli kömək edir.

Cinayətkarın iqamətgahına daxil olmaq üçün tərəfdaşlar qeyri-adi üsula əl atırlar. Skimz özünü caz pianoçusu kimi qələmə verir, heç bir musiqi duyumu olmayan Marvin isə müğənni roluna girir. Onların malikanəyə bu cür gəlişi gözlənilməz hadisələrin başlanğıcına çevrilir.

«Cyberflic» adlı fantastik komediya filmi rejissor Antonio Marqeriti tərəfindən lentə alınıb. ABŞ və İtaliyanın birgə istehsalı olan bu ekran əsəri 1997-ci ildə işıq üzü görüb. Baş rolları Terens Hill, Frits Sperberq, Cess Hill və Şon Kanninqem canlandırıblar.