Gənc amerikalılar

London küçələrində nüfuzlu narkobaronlar ard-arda amansızlıqla qətlə yetirilir. Şayiələrə görə, cinayətlərin arxasında heç bir cinayət qanununu tanımayan və qurbanlarını başdan bir, bədəndən beş güllə ilə vuran gənclər dayanır.

Bu qanlı hadisələrin qarşısını almaq üçün Skotland-Yard xüsusi istintaq qrupu yaradır. Britaniyalı polislərə yardım etmək məqsədilə narkotiklərlə mübarizə üzrə ixtisaslaşmış amerikalı detektiv okeanın o tayından Londona ezam olunur.

"The Young Americans" adlı kriminal dram rejissor Denni Kennon tərəfindən lentə alınıb. Böyük Britaniya və Fransanın birgə istehsalı olan 1993-cü il filminin baş rollarında Viqqo Mortensen, Ceyms Daqqan, Klifford Predcen və Devid Doyl çəkiliblər.