Taksi

Gənc Pas ilə atası arasındakı münasibətlər ilk baxışdan adi nəsillər arası qarşıdurma kimi görünürdü. Ata artıq böyümüş qızının həyat tərzini və dost çevrəsini qəbul etmək istəmirdi. Onun fikrincə, cəmiyyətdə fərqlənən gənclər, əcnəbilər və qeyri-adi təbəqələr arzuolunmaz şəxslər idi və qızı belə insanlardan uzaq durmalı idi.

Pas Dani adlı bir gənclə tanış olduqdan sonra bu gərginlik fəlakətli istiqamət alır. Qız şəhərdə xüsusi bir taksi sürücüləri dəstəsinin fəaliyyət göstərdiyini öyrənir. Küçələri «arzuolunmaz ünsürlərdən» təmizləmək məqsədi güdən bu qruplaşmanın maşınına əyləşən fərqli tərzli sərnişinlər bir daha geri qayıtmır.

İspaniya istehsalı olan bu kriminal dram filmi «Taksi» 1996-cı ildə ekranlara çıxıb. Rejissor Karlos Sauranın lentə aldığı filmin baş rollarında Aqata Lis, Karlos Fuentes, Anxel de Andres Lopes və Pilar Kastro çəkilib.