Təmiz reputasiya

Şərqi Afrikanın kiçik bir qəsəbəsində çalışan polis rəisi Lüsyen Kordye ətrafdakıların gözündə heç bir nüfuza malik deyil. Ərazinin yeganə asayiş keşikçisi heç nəyi görməmək və eşitməmək prinsipinə sadiq qalaraq qalmaqallardan qaçır. Yerli sakinlər onun bu acizliyini bildiklərindən polis rəisini qətiyyən ciddiyə almır və daim ələ salırlar.

Lakin Kordye uzun illər qınında qalan tapançadan ilk dəfə atəş açdıqdan sonra onun davranışı tamam dəyişir. Artıq problemləri kökündən həll etməyin yolunu qətllərdə görən polis düşmənlərini bir-bir aradan götürməyə başlayır. Camaat onu əvvəlki kimi qorxaq və sadəlövh zənn etdiyi üçün o, şübhələrdən tamamilə uzaq qalır.

Fransa istehsalı olan «Coup de torchon» kriminal dram və komediya filmi 1981-ci ildə nümayiş olunub. Ekran əsərinin rejissoru Bertran Tavernyedir. Əsas obrazları Filipp Nuare, Eddi Mitçell, Fransua Perro və Mişel Bon canlandırıblar.