Əli Zaua, küçələrin şahzadəsi

Əli, Kvita, Omar və Bukber Kasablanka küçələrində sağ qalmağa çalışan kimsəsiz yeniyetmələrdir. Onların gündəlik həyatı dilənçilik, zorakılıq və cəmiyyətin laqeydliyi ilə doludur. Çətinliklərə qarşı birgə duruş gətirən dostlar kiçik bir qardaşlıq qururlar, lakin rəqib dəstənin hücumu nəticəsində Əlinin öldürülməsi hər şeyi alt-üst edir.

Yoldaşları Əlinin ölümünü polisdən gizlətməyə məcbur qalırlar. Onlar dostlarının kimsəsizlər qəbiristanlığında adsız basdırılmasını istəmirlər. Əlini layiqincə dəfn etmək üçün uşaqlar onun ən böyük arzusunu gerçəkləşdirməyə və cənazəsini xəyalını qurduğu adaya aparmağa qərar verirlər.

«Ali Zaoua, prince de la rue» adlı cinayət dramını Nabil Ayuş çəkib. ABŞ, Fransa, Belçika, Mərakeş və Tunis istehsalı olan bu film 2000-ci ildə işıq üzü görüb. Baş rolları Səid Taqmaui, Məhəmməd Məcd, Əbdülqadir Lofti və Munim Kbab canlandırıblar.