Maşın

«Maşın» ləqəbli komediya ustası Bert Krayşer karyerasında durğunluq və ailə daxili problemlərlə üzləşir. Onun ən məşhur çıxışı tələbəlik illərində Rusiyadakı sərgüzəştləri, xüsusən də yerli quldurlarla birlikdə sərxoş vəziyyətdə Moskvaya gedən qatarı necə qarət etməsi barədə əhvalatdır.

Qızının on altı yaş mərasimində keçmiş günlər qəfildən Bertin qarşısına çıxır. Məclisə gələn rus cinayətkar dəstəsinin rəhbəri İrina, Berti və atasını iyirmi üç il əvvəl həmin qatardan oğurlanmış qol saatını tapmaq üçün yenidən Rusiyaya getməyə məcbur edir.

ABŞ və Serbiya istehsalı olan «The Machine» filmi 2023-cü ildə rejissor Piter Atensio tərəfindən çəkilib. Kriminal komediyada əsas obrazları Bert Krayşer, Emmanuel Todorov, Andriya Nikçeviç və Branislav Çubrilo canlandırıblar.