Qarışqalar kralı

Uzun müddət təsadüfi qazanclarla dolanan Şon Krouli nəhayət tikinti şirkətində gəlirli bir iş tapır. Tezliklə o, şirkətin rəhbəri və eyni zamanda cinayətkar olan Rey Mettyus ilə tanış olur. Rey ona mane olan bir vəkili aradan qaldırmaq müqabilində on üç min dollar təklif edir. Şon bu təklifi qəbul edir və qətli həyata keçirir.

Lakin sifarişçi vəd etdiyi pulu ödəməkdən boyun qaçırır və narazılıq edəcəyi təqdirdə Şonu məhv etməklə hədələyir. Hadisələrin bu cür gedişi qarşı tərəfi qorxutmur. İçindəki qatil instinktini kəşf edən Şon Mettyusa qarşı amansız bir intiqam mübarizəsinə başlayır.

«Qarışqalar kralı» (King of the Ants) trilleri 2003-cü ildə ABŞ-da rejissor Stüart Qordon tərəfindən çəkilib. Filmdə əsas rolları Tino Markes kiçik, Şuko Akune, Briana Beqi və Antuan Cozef canlandırıb.