İtkin düşmüş qız

On beş il əvvəl iki bacının evdən qaçması faciə ilə nəticələnmişdi. Həmin vaxt on yeddi yaşlı Laura izsiz-tozsuz yoxa çıxmış, on yaşlı Eliza isə baş verənləri tamamilə unutmuşdu. İllər keçir, böyüyüb jurnalist olan Eliza keçmişin dumanlı xatirələri ilə yaşamağa davam edir.

Tikinti karxanasında gənc qız cəsədinin tapılması xəbəri Eliza Kasteli doğma Pila-sür-Mer şəhərinə qayıtmağa vadar edir. O, tapılan cəsədin bacısına aid olduğuna inanır. Həqiqəti üzə çıxarmaq istəyən Eliza şəxsi araşdırmaya başlayır və yaddaşındakı qırıq-qırıq fraqmentləri birləşdirməyə çalışır.

Fransa və Belçika istehsalı olan «İtkin düşmüş qız» («La disparue du Pyla») filmi 2014-cü ildə rejissor Didye Alber tərəfindən çəkilib. Kriminal dram janrındakı ekran əsərində baş rolları Dunya Kozin, Devid Mira-Cover, Manon Jomen və Lüsi Jan canlandırıb.