Mükəmməl Nəticə

Altı müxtəlif məktəbli gələcək həyatlarını təyin edən vacib buraxılış imtahanının cavablarını ələ keçirmək üçün təhlükəli plan qurur. Kayl arzuladığı memarlıq fakültəsinə daxil olmaq üçün lazımi balı toplaya bilmir, dostu Mett isə sevgilisinin təhsil aldığı Merilend Universitetinə düşmək istəyir. Əməliyyatın sxemini Françeska hazırlayır, əlaçı Anna ailəsinin ümidlərini doğrultmamaq qorxusu yaşayır, istedadlı basketbolçu Desmond anasının təkidi ilə NBA xəyallarını təxirə salır, tənha Roy isə bu dəstəyə təsadüfən qoşulur.

İmtahan mərkəzinə gizlicə daxil olub testləri oğurlamaq üçün bu fərqli gənclər bir araya gəlməli olurlar. Başlanğıcda bir-birləri ilə heç bir ortaq cəhəti olmadığını düşünən yeniyetmələr mürəkkəb planı həyata keçirərkən yaxınlaşır və həqiqi komandaya çevrilirlər.

«The Perfect Score» adlı gənclik komediyası rejissor Brayan Robbins tərəfindən lentə alınıb. ABŞ, Kanada və Almaniya birgə istehsalı olan bu film 2004-cü ildə nümayiş olunub.