Dəyişmə

Kanadalı gənc dizayner Sofi tətil üçün heç bir planı olmadığına görə yayın gəlişini həvəssiz qarşılayır. İnternetdə evlərin müvəqqəti dəyişdirilməsi təklifini görən qız bu fürsətdən yararlanmaq qərarına gəlir və bir aylığına Parisdə, Eyfel qülləsinə mənzərəsi olan mənzilə köçür. İlk gün hər şey qaydasında keçir və yeni ünvandakı rahatlıq ona zövq verir.

Lakin səhəri gün onun otağına qəfil polis əməkdaşları daxil olur. Qonşu otaqda başı kəsilmiş naməlum meyit aşkarlanır və hüquq-mühafizə orqanları Sofini evin əsl sahibi Benedikt Serto hesab edirlər. Özünün əslində kim olduğunu sübut edə bilməyən qız çıxılmaz vəziyyətə düşür.

«Dəyişmə» (Switch) adlı Fransa istehsalı olan cinayət trilleri 2011-ci ildə işıq üzü görüb. Filmin rejissoru Frederik Şöndörferdir, əsas obrazları isə Siril Lekont, Sofi Foçer, Lika Minamoto və Bruno Todeski canlandırıb.