Zəncirvari reaksiya

«321» adlı reklam agentliyinin rəhbəri Norber Şarole müştəriləri cəlb etmək üçün təzə fikirlər axtarır. Gənc əməkdaş Pol Marten yaşıl qurbağa obrazı üzərində qurulan maraqlı təklif irəli sürür. Lakin iclas zamanı müdir bu ideyanı öz adına çıxararaq qəbul etdirir və gəncin zəhmətini heçə sayır.

Haqsızlıqla üzləşən Pol şirkətdə bəzi insanların artıq olduğu qənaətinə gəlir. Çox keçmədən iş yerində ölümlə nəticələnən qəribə və gözlənilməz hadisələr zənciri başlayır. Baş verən bu qəzalar sayəsində Marten pillə-pillə irəliləyərək agentliyin rəhbəri vəzifəsinə qədər yüksəlir.

1963-cü il istehsalı olan «Zəncirvari reaksiya» filmini fransız rejissoru Marsel Blüval Fred Kassakın romanı əsasında lentə alıb. Kriminal komediya janrındakı ekran əsərində baş rolları Jilber Jenia, Mark Arian, Jan-Klod Remolö və Anri Virlojö canlandırıb.