Çinli bukmekerin qətli

Gecə klubunun sahibi Kosmo Vitelli qumar həvəsi ilə tanınsa da, həmişə özünü təmkinli və heç kəsdən asılı olmayan biri kimi aparır. Lakin böyük borclarını bağlamaq istəyərkən kart masasında yenidən külli miqdarda pul uduzur. Gəlirləri ilə bu məbləği ödəməyə çalışan Kosmonun qarşısına borc sahibi olan mafiya üzvləri çıxır.

Cinayətkarlar borcun silinməsi əvəzinə ondan çinli bukmekeri, yəni öz rəqiblərini öldürməyi tələb edirlər. Bir müddət tərəddüd edən klub sahibi təklifi qəbul etmək məcburiyyətində qalır. Bu təhlükəli tapşırığı icra etmək qərarı onu daha mürəkkəb və arzuolunmaz hadisələrin içinə salır.

1976-cı ildə ABŞ-da istehsal edilmiş «The Killing of a Chinese Bookie» filminin rejissoru Con Kassavetisdir. Əsas obrazı Ben Qazzara canlandırıb, digər rollarda isə Con Finneqan, Vinsent Di Paolo və El Ruban çəkiliblər.