İnkoqnito

Harri böyük ustaların əsərlərini məharətlə saxtalaşdıran, lakin adını hamıdan gizli saxlayan istedadlı bir rəssamdır. Onun çəkdiyi nüsxələr çoxlu şəxsi kolleksiyalarda yer alsa da, əsl müəllifi yalnız dar bir çevrə tanıyır. Rembrandtın üslubunda yeni bir rəsm yaratmaq müqabilində 500 min dollar təklif alanda, o, bu qazancla qanunsuz işlərdən uzaqlaşıb dürüst həyata başlamaq qərarına gəlir.

İş yüksək səviyyədə tamamlanır və mütəxəssislər saxtakarlığı anlaya bilmir, lakin sifarişçilər vəd edilən pulu ödəmək istəmir. Əksinə, onlar Harrini törətmədiyi qətldə və öz yaratdığı kətanı oğurlamaqda şərləyirlər. Polisdən qaçmağa məcbur olan rəssam adını təmizə çıxarmaq üçün Rembrandt irsi üzrə tanınmış ekspert Marikeni girov götürür.

1997-ci ildə ABŞ-da istehsal olunmuş «Incognito» filminin rejissoru Con Bedemdir. Ekran əsərində əsas rolları İren Jakob, İan Riçardson, Dadli Satton və Harri Filder canlandırıblar.