Agni Dev

İnsanlarla dolu avtobus dayanacağında günün günorta çağı gənc jurnalist qız bıçaqlanaraq qətlə yetirilir. Hadisənin təhqiqatı prinsipial polis zabiti Agni Devə həvalə olunur. Çox keçmədən qurbanın mühüm məlumata sahib olan yaxın rəfiqəsi də öldürülür və bu, cinayətin izinə düşməyi daha da çətinləşdirir.

İstintaqçı həqiqətə yaxınlaşdıqca yuxarı rəhbərlik ondan işi təcili dayandırmağı tələb edir. Tezliklə aydın olur ki, polis dairələrinə Şakuntala Devi adlı nüfuzlu və amansız bir qadın siyasətçi tərəfindən ciddi təzyiq göstərilir.

2019-cu ilin istehsalı olan «Agni Dev» filmi kriminal dram janrında çəkilib. Layihənin rejissoru Jpr-dir, baş rollarda isə Bobbi Simha və Sathish Krishnan çəkiliblər.