Evaru

Nüfuzlu iş adamının xanımı Samirə yüksək rütbəli polis əməkdaşı Aşok Krişnanı qətlə yetirməkdə şübhəli bilinərək nəzarətə alınır. Qadın ifadəsində zabitin ona təcavüz etməyə çalışdığını və özünü müdafiə edərkən atəş açdığını bildirir. Qarşıdan gələn məhkəmə prosesi üçün müdafiə planı hazırlamaq zərurəti yaranır.

İşin araşdırılmasına korrupsiyaya qurşanmış polis əməkdaşı Vikram Vasudev cəlb olunur. Təqsirləndirilən şəxslə qapalı görüşlər keçirən dedektiv Samirənin dediklərini mövcud dəlillərlə tutuşdurmağa başlayır. Hər yeni sual həmin gün baş vermiş hadisələrin arxasındakı həqiqəti üzə çıxarır.

Kriminal triller janrında çəkilən «Evaru» filmi 2019-cu ildə Hindistanda istehsal olunub. Ekran əsərinin rejissoru Venkat Ramjidir. Əsas rolları Adivi Seş, Recina Kassandra, Navin Çandra və Murli Şarma ifa edirlər.