Queen

İllərdir davam edən münasibətlərinin toy mərasimi ilə tamamlanacağını gözləyən Rani nikah ərəfəsində sevgilisi tərəfindən tərk edilir. Ailələrin razılığı ilə qurulan bu planların qəfil pozulması gənc qız üçün böyük zərbəyə çevrilir. Kədərini geridə qoymaq istəyən qəhrəman uşaqlıq arzusundan vaz keçmir və bal ayına təkbaşına yollanmaq qərarına gəlir.

İlk dayanacaq olan Paris onu əvvəlcə puç olmuş xəyalların kədəri ilə qarşılayır. Lakin burada tanış olduğu Vicayalakşmi sayəsində Raninin həyatına tamam başqa təəssüratlar daxil olur. Səyahətin davamı kimi gəldiyi Amsterdamda isə qarşısına çıxan yeni dostlar ona istənilən şəraitdə özünə inanmağın vacibliyini aşılayır.

2013-cü ildə Hindistanda istehsal olunmuş «Queen» macəra dram-komediyasının quruluşçu rejissoru Vikas Bahldır. Filmdə əsas obrazı Kanqana Ranaut canlandırıb, digər mühüm rolları isə Rac Kumar Rao, Liza Heydon və Ceffri Ho ifa edirlər.