Mənim əziz amerikalılarım

ABŞ-ın iki keçmiş prezidenti Rassel Kramer və Metyu Duqlas uzun illərdir bir-birinə nifrət edirlər. Ağ Evdə böyüyən yeni siyasi qalmaqal hər iki sabiq rəhbərin adını ləkələmək təhlükəsi yaradanda onlar məcburi şəkildə eyni yola çıxırlar. İzlərini itirməyə çalışan köhnə rəqiblər xəfiyyələrdən qaçmaq üçün adət etmədikləri marşrutlara üz tuturlar.

Qurulan sui-qəsdin arxasındakı həqiqəti tapmağa çalışan qəhrəmanlar «My Fellow Americans» filmində sadə vətəndaşların gerçək həyatı ilə üz-üzə gəlirlər. Bu gözlənilməz macəra boyunca sabiq ölkə başçıları vaxtilə idarə etdikləri cəmiyyət haqqında əvvəllər heç bilmədikləri bir çox təfərrüatı kəşf edirlər.

1996-cı il istehsalı olan bu ABŞ komediyasını rejissor Piter Siqal ərsəyə gətirib. Ekran əsərində əsas rolları Cek Lemmon, Ceyms Qarner, Den Eykroyd və Con Hörd canlandırıblar.