Qovuqdakı oğlan

İmmunitet sisteminin işləməməsi səbəbindən Cimmi Livinqston uşaqlıqdan bəri tamamilə steril şəraitdə qalmaq məcburiyyətindədir. Adi bir mikrob belə onun həyatına son qoya bilər, buna görə də gənc oğlan hermetik şəffaf qovuq daxilində ömür sürür. Bütün bunlara baxmayaraq, o, qonşuluqda yaşayan Klo adlı qıza aşiq olur.

Klonun uzaq bir şəhərdə başqa biri ilə ailə qurmağa hazırlaşdığını öyrənən Cimmi yerində sakit otura bilmir. O, özünə xüsusi qoruyucu skafandr hazırlayır və sevdiyi qıza hisslərini vaxtında etiraf etmək üçün bütün ölkəni əhatə edən səyahətə çıxır. Təhlükələrdən çəkinməyən qəhrəman toy baş tutmamış mərasimə çatmağa çalışır.

2001-ci ildə ABŞ-da istehsal olunmuş «Bubble Boy» filminin rejissoru Bler Heyesdir. Layihədə baş rolları Ceyk Cillenhol, Marli Şelton, Con Kerroll Linç və Stiv Van Uormer canlandırıblar.