Sevginin hədəfində

İri sahibkarın qızı Anna Vlasovanın ticarət mərkəzinin damından yıxılaraq həyatını itirməsi hüquq-mühafizə orqanları tərəfindən intihar kimi qiymətləndirilir. Qızın qanında narkotik maddələrin aşkar edilməsi səbəbindən müstəntiq Borisov qəsd izi görmür. Lakin dünyasını dəyişən qızın bacısı Kira Annanın öz istəyi ilə canına qıydığına qətiyyən inanmır.

Kira işin vaxtından əvvəl bağlanmaması üçün müstəntiqi dəlilləri yenidən araşdırmağa razı salır. Özü də fərdi axtarışa başlayaraq hadisənin izinə düşür. Tezliklə istintaq üçün vacib sayılan və Annanı tanıyan şahidlər bir-bir müəmmalı şəkildə həlak olur və Kira həqiqətə yaxınlaşdıqca özü üçün də böyük təhlükə yaranır.

«Pod pritselom lyubvi» filmi 2012-ci ildə Ukraynada rejissor Dmitri Laktionov tərəfindən lentə alınıb. Melodram janrlı ekran əsərində baş rolları Yana Sobolevskaya, Pavel Barşak, Denis Rojkov və Vladimir Simonov canlandırıblar.