Kasak

Tələbə olan Divya bacıları və qayğıkeş valideynləri ilə birlikdə dinc bir həyat sürürdü. Lakin ailəsi onun üçün varlı bir namizəd taparaq qızı ərə vermək qərarına gəlir. Divya bu təklifə qarşı çıxsa da, gənc qızla tanış olmağa gələn oğlan ona ilk baxışdan vurulur. Nəticədə doğmalarının təzyiqinə tab gətirə bilməyən qız sevmədiyi insanla ailə qurmağa məcbur olur.

Təmtəraqlı yeni ev və qayğıkeş ər belə gəlinin kədərini dağıda bilmir. Ərinin bütün cəhdlərinə baxmayaraq, Divya laqeyd və qəmgin qalmağa davam edir. Çünki onun qəlbi ədalət uğrunda mübarizə aparan, lakin təsadüfi güllə qurbanı olmuş keçmiş sevgilisinin xatirəsi ilə yaşayır.

1992-ci il istehsalı olan Hindistan melodramı «Kasak» filminin rejissoru K. Bapayyadır. Əsas rolları Aparacita, Asrani, Lakşmikant Berde və Cek Qaud canlandırıblar.