Janwar

Nüfuzlu sənayeçi Şrivastava oğlanlarının yalnız varlı və əsilzadə ailələrdən olan qızlarla evlənməsini tələb edir. Katibə Simanı sevən böyük oğlu Mahendra atasına qarşı çıxmağa cəsarət etmir. Ailənin kiçik oğlu Sunder isə qaydalara əhəmiyyət verməyərək dostu ilə Kəşmirə, tennis yarışına yola düşür. O, burada turnir iştirakçısı olan Sapna ilə tanış olur və gənclər arasında sevgi yaranır. Lakin Sapnanın atası Şrivastavanın sıravi işçilərindən biridir.

Mahendra ezamiyyətdə olarkən valideynləri ona varlı bir gəlin tapır. Əlaqə saxlaya bilmədiyi sevgilisindən hamilə qalan Sima kömək üçün onların evinə gəlir. Şrivastava qızı pulla susdurmağa çalışsa da, təhqir olunan Sima oradan qaçır. Hadisələrdən narahat olan Sunder Simanı qorumaq və qardaşını tapmaq üçün Kəlkətəyə yola düşür. Gənc oğlan həm qardaşının taleyini həll etməli, həm də öz sevgisini müdafiə etməlidir.

«Janwar» filmi 1965-ci ildə Hindistanda rejissor Bhappi Soni tərəfindən çəkilib. Melodram janrındakı bu musiqili ekran əsərində baş rolları Şammi Kapur, Racişri, Rehman və Şyama canlandırıb.