Lera

İyirmi yaşlı Lera Meşşeryakova anası ilə yola gedə bilmir. Atası, bibisi Olqa və nənəsi ona sevgi bəsləsələr də, iradəsizlikləri ucbatından gənc qızı daim tək qalmağa vadar edirlər. Leranın yoxsul bir gənc olan Denis ilə ailə qurmaq qərarı evi büsbütün qarışdırır. Buna dözməyən ana qəzəb anında qızın əslində övladlığa götürüldüyünü etiraf edir.

Evdən ayrılan Lera Denis ilə yeni həyata başlayır və tezliklə işlər qaydasına düşür. Atası kürəkəninə iş tapır, gözlənilən körpə xəbəri isə ananı barışmağa məcbur edir. Bütün bunlara baxmayaraq, Leranı doğma anasını axtarıb tapmaq fikri rahat buraxmır. Qız bilmir ki, həqiqətin ardınca getmək ona çox baha başa gələcək.

«Lera» filmi 2007-ci ildə Rusiyada rejissor Tatyana Doqileva tərəfindən melodram janrında lentə alınıb. Baş rolları Yuliya Telpuxova, Dmitri Xaratyan, Darya Mixaylova və Marina Mayko canlandırıblar.