Sadəcə Ceyk

Kolorado ştatının Liberti şəhərindən olan Ceyk Kollinz Neşvillə yollanaraq kantri musiqisi sahəsində uğur qazanır. Şöhrət arxasınca qaçarkən o, təkcə doğma yurdunu deyil, sevgilisi Emberi də geridə qoyur. Lakin ilk böyük müqavilə ilə bağlı çətinliklər yarananda səsyazma studiyasının prodüseri onunla əməkdaşlığa son qoyur.

İlham tapmaq və yeni mahnılar bəstələmək istəyən Ceyk yenidən doğulduğu şəhərə qayıtmaq qərarına gəlir. Bu vaxt ərzində Ember öz biznesini qurub və asudə vaxtlarında uşaqlara gitara çalmağı öyrədir. Doğma məkanda yenidən kəsişən yollar və ortaq xatirələr onların hisslərini təzələyə bilər.

ABŞ istehsalı olan «Sadəcə Ceyk» melodram filmi 2023-cü ildə rejissor Brendon Klark tərəfindən çəkilib. Ekran əsərinin baş rollarında Rob Mayes, Brittani Bristou, Leksi Kontursi və Gigi Orsillo çıxış edir.