Bağışla, amma mən səni sevirəm

Otuz yeddi yaşlı Aleks yetkin insan kimi yaşamaqdan qaçır və daha çox gənclərə xas qayğısızlıq nümayiş etdirir. Uzun müddətdir birlikdə olduğu nişanlısı Elena ilə yollarını ayıran Aleks işlərini və gündəlik qayğılarını yoluna qoymağa çalışır. Məhz bu ərəfədə o, yaşına görə olduqca yetkin düşüncəli on yeddi yaşlı Niki ilə tanış olur.

Onların arasındakı sadə ünsiyyət çox keçmədən səmimi sevgiyə çevrilir. Lakin bu münasibət hər iki tərəfin çevrəsində kəskin etirazla qarşılanır. Həm Aleksin, həm də Nikinin qohumları və dostları böyük yaş fərqini qəbul etmək istəmir və cütlüyün qarşısında ciddi maneələr yaradırlar.

İtaliya istehsalı olan «Scusa ma ti chiamo amore» filmi 2008-ci ildə rejissor Federiko Moççia tərəfindən çəkilib. Melodram janrındakı ekran əsərində baş rolları Raul Bova, Mikela Kvattroçokke, Françeska Ferrattso və Beatriçe Valente canlandırırlar.