Humraaz

Rəqs truppasının rəhbəri Karan Malhotra və kollektivin aparıcı rəqqasəsi Priya bir-birini sevir, firavan bir gələcək arzulayırlar. Şöhrət qazanmaq asan olmasa da, gənclərin bəxti gətirir. Karan komandası ilə birlikdə zəngin iş adamı Rac Sinqhaniyaya məxsus olan dəbdəbəli gəmidə çıxış etmək üçün dəvət alır.

Səfər heyət üçün böyük ümidlərlə başlasa da, tezliklə Racın Priyaya xüsusi maraq göstərdiyi diqqətdən qaçmır. Karan sevgilisinə tam etibar etdiyi üçün ətrafdakıların xəbərdarlıqlarına əhəmiyyət vermir. Lakin gəmi sahibinin Priyaya evlilik təklifi etməsi gənc qadını böyük sərvət ilə səmimi sevgisi arasında seçim qarşısında qoyur.

«Humraaz» adlı Hindistan istehsalı olan bu melodram və triller 2002-ci ildə ekranlara çıxıb. Filmin rejissorluğunu Abbas Alibhai Burmawalla və Mastan Alibhai Burmawalla qardaşları ediblər. Əsas rollarda Bobbi Deol, Akshay Khanna, Ameesha Patel və Conni Lever çəkiliblər.