Dəlicəsinə sevgi

Anastasiya və Andrey həm həmkar, həm də gizli sevgilidirlər. Şöbə müdiri vəzifəsinə yüksəlmək arzusunda olan kişi bu münasibətlərin karyerasına mane olacağından qorxaraq əlaqəni hamıdan gizlədir. Qadın sevgilisinin peşəkar uğurları hər şeydən üstün tutduğunu və məqsədinə çatmaq naminə hər addıma hazır olduğunu aydın dərk edir.

Gözlənilmədən qarşısına çıxan şən xasiyyətli Kostya tez bir zamanda Nastyanın ürəyinə yol tapır. Bu səmimi, dürüst və diqqətcil yeni pərəstişkar soyuqqanlı Andreyin tam əksidir. Lakin Kostyanın ağır xəstəliyi var və o, daim həkim nəzarətində qalmağa məcburdur. Beləliklə, qadın gələcəyini ağır xəstə amma həqiqi sevgi bəxş edən insanla yoxsa karyerist və hissiz bir kişi ilə bağlayacağını seçməlidir.

«Dəlicəsinə sevgi» filmi 2008-ci ildə Rusiyada ekranlara çıxmışdır. Rejissor Alyona Zvantsovanın çəkdiyi bu melodramda əsas rolları Svetlana Antonova, Mixail Truxin, Vera Polyakova və Natalya Surkova ifa edirlər.