Dilsiz məhəbbət

Uzun illərdir şərik olan iki ailə uşaqlıqdan dostluq edən övladlarını evləndirmək qərarına gəlir. Azadlığı sevən, çılğın Suhani sakit təbiətli Svaqata səmimi qəlbdən bağlıdır və onunla xoşbəxt ailə quracağına inanır. Gənclərin nişan mərasiminə hazırlıq görüldüyü bir vaxtda hadisələrin gedişatı dəyişir.

Londondan Suhaninin əmisi qızı Rumzum gəlir. Ənənələrə bağlı, təvazökar və həlim xasiyyətli bu qız Svaqatın diqqətini dərhal cəlb edir. Rumzuma qarşı yaranan romantik hisslər gəncin fikrini qarışdırır və Suhani ilə planlaşdırılan nikahı böyük sual altında qoyur.

2015-ci ildə Hindistanda çəkilmiş «Bezubaan Ishq» filmi melodram və musiqili janrdadır. Ekran əsərinin rejissoru Casvant Qanqanidir. Əsas rolları Nareş Patel, Edcey Şarma, Muqdha Qodse və Farida Calal ifa ediblər.