The Influencer

Sosial şəbəkələrdə geniş izləyici kütləsi toplayan gənc Rinrada kiberzorakılıq və ağır böhtanlarla üz-üzə qalır. Təzyiqlərə dözə bilməyən qız binanın on dördüncü mərtəbəsindən tullanaraq həyatına son qoyur. Lakin ölümdən dərhal sonra o biri dünyada gözlərini açan qəhrəmana xəyalət cildində yer üzünə qayıtmaq üçün qısa fürsət verilir.

«The Influencer» filminin baş qəhrəmanı ona ayrılan məhdud müddətdə intiharının arxasındakı həqiqətləri üzə çıxarmalıdır. Rinrada həm ona zərər verənlərdən intiqam almağa, həm də yarımçıq qalan işlərini bitirməyə çalışır. Bu müddətdə isə o biri dünyadan göndərilən Hanna adlı sirli qız qaydalara əməl olunmasına nəzarət edir.

Tayland istehsalı olan bu qorxu və triller filmi rejissorlar Athit Ariyawongsa və Artistaya Arriyawongsa tərəfindən lentə alınıb. 2026-cı ildə təqdim olunan ekran əsərində rolları Khunnarong Prathetrat, Chananticha Chaipa, Yoshi Rinrada Thurapan və Natcha Nina Jessica Padowan ifa edirlər.