Subspecies

ABŞ-dan olan üç tələbə qız yerli folklor nümunələrini toplamaq məqsədilə Rumıniyanın ucqar kəndinə yollanır. Qonaqları xəritələrdə və tarixi qeydlərdə adı keçməyən köhnə qəsrin xarabalıqları yaxınlığındakı qədim qalada yerləşdirirlər. Beş yüz il əvvəl şəhəri türk hücumlarından qoruyan qüvvə barədə xatirələr kənddə vampir rəvayətlərinin yaranmasına səbəb olub.

Amerikalı qızlar bu əfsanələrə ciddi yanaşmırlar. Çox keçmədən tələbələrdən biri bölgədə gecə heyvanlarını araşdırdığını iddia edən gənc bir oğlanla maraqlanmağa başlayır.

1990-cı ildə ekranlara çıxan «Subspecies» qorxu və melodram filmi eyniadlı franşizanın ilk hissəsidir. ABŞ və Rumıniya istehsalı olan bu layihənin rejissoru Ted Nikolaudur, əsas rolları isə Maykl Uotson, Laura Mey Teyt, Mişel MakBrayd və İvan C. Rado canlandırıb.