Rammstein in Amerika

Alman rok qrupu Rammstein okeanın o tayında uğur qazanmazdan əvvəl uzun bir yol qət edib. «Rammstein in Amerika» sənədli filmi qrupun köklərini Berlində divarın yıxılmasından əvvəlki 1980-ci illərin Şərqi Almaniyasında axtarır. Ekran əsəri musiqiçilərin ilkin fəaliyyətini və 1990-cı illərin sonunda Birləşmiş Ştatlara etdikləri ilk qastrol səfərlərini təqdim edir.

Xronika alman rokerlərinin Amerika səhnəsində mövqe tutmaq cəhdlərindən bəhs edir. Hekayə onların Nyu-Yorkun məşhur Madison Square Garden arenasında 2010-cu ilin dekabrında baş tutan konsertinə doğru irəliləyir. Həmin çıxış qrupun ABŞ-də təxminən on illik fasilədən sonra verdiyi ilk böyük konsert idi.

2015-ci ildə işıq üzü görən bu musiqili filmin rejissoru Hannes Rossaxerdir. Layihədə Rammstein qrupunun üzvləri, o cümlədən Till Lindemann, Rixard Kruspe və Paul Landers çıxış edir.