Remember the Time

Sarayda uğursuz çıxış edən iki təlxək edama göndərildikdən sonra hökmdarların qarşısına növbəti qonaq çıxır. Sehrli qumun köməyi ilə öz əsl simasını göstərən bu sirli cadugər oxumağa başlayır. Kraliçanın diqqətini dərhal cəlb edən bu ifa fironun qəzəbinə səbəb olur və o, əsgərlərə yadellinin tutulmasını əmr edir. Lakin sehirbaz ani olaraq yoxa çıxaraq şəhərin başqa bir nöqtəsinə keçir.

Kədərli kraliçanın yanına gizlicə qayıdan sehirbaz onu öpür və təqibdən yayınmağa davam edir. Keşikçilər onu axtararkən, o, taxt zalında ovsunlanmış xidmətçilərlə birlikdə rəqs etməyə başlayır. Mahnı başa çatdıqda ətrafdakılar yox olur və saray sahibi onu yaxalamaq istəyir. Təqibin sonunda sehrbaz yenidən quma çevrilərək havaya sovrulur.

1992-ci ildə ABŞ-da istehsal olunmuş «Remember the Time» qısametrajlı musiqili filmdir. Ekran əsərinin quruluşunu Con Sinqlton verib. Baş rolları Maykl Cekson, Eddi Merfi, Vayli Dreyper və Tom Lister kiçik canlandırıblar.