Motsart. Rok-opera

Zalsburqda knyaz-arxiyepiskop vəzifəsinə Kolloredonun gəlməsi Volfqanq Motsartın həyatında çətin bir dövrün başlanğıcı olur. Yeni rəhbər sərt və avtoritar təbiəti ilə seçilir. O, gənc bəstəkarın sənətini qəbul etmir, onun cəsarətli və çılğın davranışlarına dözümsüz yanaşır.

Doğma şəhərindəki ab-hava iyirmi yaşlı musiqiçi üçün dözülməz həddə çatır. Çıxış yolu axtaran gənc bəstəkar Zalsburqu tərk etmək qərarına gəlir. O, daha firavan gələcək qurmaq ümidi ilə anası ilə birlikdə Avropanın paytaxtlarına doğru yola düşür.

Fransa istehsalı olan «Mozart L'Opéra Rock» musiqili filmi 2009-cu ildə təqdim edilib. Ekran əsərinin quruluşçu rejissoru Olivye Daandır. Əsas rolları Yamin Dib, Melissa Mars, Delfin Qransar və Tamara Fernando canlandırıblar.