El caníbal

Laura Krouford adlı gənc qadın Qərbi Avropa şəhərlərinin birində cinayətkarlar tərəfindən qaçırılır. Onu Cənubi Amerikadakı tropik bir adaya apararaq iblisə sitayiş edən qəbilələrin yaşadığı cəngəllikdə gizlədirlər. Quldurlar qızın valideynlərindən külli miqdarda fidyə tələb edir, adada saxlanılan qıza isə fiziki zorakılıq və işgəncələr tətbiq edirlər.

İki nəfər qadını tapmaq üçün axtarışa başladığı ərəfədə Laura kömək gözləmədən əsirlikdən qaçmağı qərara alır. O, quldurların əlindən qurtulub meşənin içinə üz tutsa da, yolu vəhşi adamyeyən qəbilənin məskunlaşdığı əraziyə çıxır və yerli kannibalların əlinə keçir.

«El caníbal» adlı bu qorxu filminin rejissoru Xesus Frankodur. İspaniya, Fransa və Qərbi Almaniyanın birgə istehsalı olan ekran işi 1980-ci ildə nümayiş etdirilmişdir. Əsas rollarda Antonio Mayans, Verner Pohat, Rassel Keys və El Klayver çəkilmişlər.