Təyinat

İngiltərənin musiqi məktəbi ilə tanınan kiçik bir şəhərində skripkaçı gənc qız Sendi qəfildən yoxa çıxır. O, yerli meşəlikdən keçərkən izsiz-tozsuz itir və axtarışlar heç bir nəticə vermir. Hadisədən sonra yerli sakinlər bədnam meşənin ətrafını dəmir hasarla bağlayırlar.

Üç il ötür və Joanna adlı digər gənc musiqiçi mühüm solo konsertinə hazırlaşır. Skripkada qazandığı uğurları hər zaman atasına həsr edən qız, onun təcili iş səfəri səbəbindən çıxışına gələ bilməyəcəyini öyrənir. Ən yaxın bildiyi insandan gələn bu xəbər qızın sevgisini qəfil nifrətə çevirir.

Böyük Britaniya istehsalı olan «The Appointment» («Təyinat») qorxu filminin rejissoru Lindsi S. Vikerzdir. 1982-ci ilin bu ekran əsərində baş rolları Auriol Qoldinqhem, Samanta Ueysom, Ceyn Merrou və Alan Stüart canlandırıblar.