İnsan qırxayağı

Avropanı gəzən Lindsi və Cenni adlı iki amerikalı rəfiqə gecə vaxtı Almaniya meşələrindən keçərkən avtomobillərinin təkəri sıradan çıxır. Kömək axtarmaq üçün yaxınlıqdakı kimsəsiz evə üz tutan qızlar, ev sahibi tərəfindən dərmanla yatızdırılırlar.

Özlərinə gələndə onlar ev yiyəsinin təqaüdə çıxmış məşhur cərrah doktor Hayter olduğunu öyrənirlər. Vaxtilə bitişik əkizləri ayırmaqla tanınan bu həkim indi tamamilə fərqli bir plan hazırlayıb: insanları tək bir həzm sistemi olan vahid varlığa çevirmək. Daha əvvəl üç it üzərində apardığı sınağın ölümlə nəticələnməsi onu dayandırmır.

«The Human Centipede (First Sequence)» qorxu filmi 2009-cu ildə Niderlandda rejissor Tom Siks tərəfindən çəkilib. Əsas rollarda Akihiro Kitamura, Eşli S. Uilyams, Piter Blankensteyn və Eşlinn Yenni çıxış edirlər.