Morq

Dieqo gecə vaxtı avtomobili ilə piyadanı vurur və qorxuya düşərək hadisə yerindən qaçır. O, baş verənləri gizlətməyə çalışsa da, qəzanın nəticələri çox keçmədən onu tapır.

Ertəsi gün gənc oğlan çalışdığı mühafizə şirkəti tərəfindən yerli morqa gecə növbəsinə göndərilir. Orada olan yeganə cəsəd məhz polisin kimsəsiz yolda aşkar etdiyi həmin bədbəxt adama məxsusdur. Digər növbətçi binanı tərk edən kimi zülmət otaqlarda və dəhlizlərdə qəribə hadisələr cərəyan etməyə başlayır.

«Morgue» adlı qorxu filmi Paraqvay istehsalıdır və 2019-cu ildə işıq üzü görüb. Ekran əsərinin rejissoru Uqo Kardosodur, əsas rolları isə Fransisko Ayala, Mariya del Mar Fernandes, Abel Martines və Pablo Martines canlandırıblar.