Ölüm astanasında

Anasının gözlənilməz intiharından sonra Mario qoca atası Manueli öz evinə gətirmək qərarına gəlir. O, hamilə arvadı və əvvəlki nikahından olan yeniyetmə qızı ilə birlikdə yaşayır. Qız nəvəsi babasının gəlişinə sevinir və ona qulluq etməyə hazırlaşır, lakin evin yeni xanımı bu vəziyyətdən qətiyyən razı qalmır.

Havalar qızışdıqca ailədaxili gərginlik də böyüyür. Manuelin hərəkətlərində getdikcə daha qəribə və narahatedici hallar müşahidə olunur. Çox keçmir ki, bu qorxulu dəyişikliklərin təkcə ona deyil, ətrafdakı bütün yaşlı insanlara da sirayət etdiyi aydınlaşır.

«Viejos» adlı İspaniya istehsalı qorxu filmi 2022-ci ildə ekranlara çıxıb. Layihənin rejissor kürsüsünü Fernando Qonsales Qomes və Raul Sereso bölüşüb. Əsas rolları Enrike Kasorla, Irene Anula, Niko Samitovski və Emilio Qomes canlandırıblar.